Futbollisti Tedi Cara ka qenë viktimë e një episodi dhune nga tifozët, në ndeshjen e Superligës mes Kukësit dhe Partizanit që u zhvillua në ‘Kukës Arena’.
Pasi realizoi një gol me goditje dënimi në minutën e 14, futbollisti i Partizanit u nis të festonte, por nga tribuna një shishe e ndërpreu në mes. Ajo e goditi futbollistin drejt e në fytyrë dhe për pasojë Cara e pati të pamundur të vazhdonte lojën, duke u zëvendësuar nga Cvetanovski. Ndërkohë që policia e Kukësit ka shpallur në kërkim një shtetas për shkak se në stadiumin “Kukës Arena” ka goditur me send të fortë futbollistin Tedi Cara. Është identifikuar autori dhe është shpallur në kërkim nga autoritetet përkatëse, vijon puna për kapjen e tij.
Bëhet e ditur se personi që ka sulmuar është me iniciale A.E, 47-vjeçar, banues në Kukës.
Njoftimi i DVP Kukës:
Specialistët për Hetimin e Krimeve të Komisariatit të Policisë Kukës referuan materialet në Prokurori dhe shpallën në kërkim, për veprën penale “Goditja e sportistit, trajnerit, arbitrit dhe ndërmjetësit sportiv”, shtetasin A. E., 47 vjeç, banues në Kukës, pasi gjatë ndeshjes së futbollit “Kukësi-Partizani”, të zhvilluar më datë 19.09.2022, në stadiumin “Kukës Arena”, ka hedhur një send të fortë (shishe me ujë të ngrirë) në fushë që ka goditur njërin nga futbollistët, shtetasin T. C. Vijon puna për kapjen e tij.
