Paraditen e sotme nëntë persona janë paraqitur në spitalin Rajonal të Fierit, të cilët paraqitnin shenja të intoksikimit.
Ndërkohë që gjashtë prej tyre kanë marrë ndihmë mjekësore.
Bëhet me dije se të paraqiturit në spital janë punonjës të një fabrike përpunimi ulliri. Nga verifikimet paraprake, dyshohet se helmimi i tyre ka ardhur si pasojë e një reaksioni të shkaktuar nga produkti aromatizues (parfum) i përdorur nga njëra prej këtyre shtetasve, thuhet ndër të tjera në njoftimin e policisë në lidhje me ngjarjen që ka ndodhur ditën e sotme në Fier.
Sipas mjekëve pacientët i janë nënshtruar ekzaminimeve mjekësore, ndërsa 4 prej tyre do të mbahen në observim në spital.
Nga ana tjetër grupi hetimor po punon për zbardhjen e plotë të ngjarjes.
Njoftimi i Plotë i Policisë së Shtetit:
Fier / Informacion paraprak
Rreth orës 10:00, në Spitalin Rajonal Fier, kanë shkuar me shenja helmimi dhe ndodhen jashtë rrezikut për jetën, 9 shtetase, të cilat punojnë në një fabrikë përpunim ullinjsh, në aksin rrugor “Fier – Vlorë”.
Nga verifikimet paraprake, dyshohet se helmimi i tyre ka ardhur si pasojë e një reaksioni të shkaktuar nga produkti aromatizues (parfum) i përdorur nga njëra prej këtyre shtetasve.
Grupi hetimor po punon për zbardhjen e plotë të ngjarjes.
