Një ngjarje e rëndë është shënuar ditën e sotme në në zonën e Potamit në Himarë, ku një 5-vjeçar sipas informacioneve të para humbi jetën, pasi u godit nga një mjet lundrues. Shtetasi H. K., rreth 40 vjeç, duke drejtuar një mjet lundrues tip gomone, e ka goditur 5-vjeçarin teksa ka qenë duke notuar në afërsi të bregut. Fëmija për shkak të plagëve të marra ka ndërruar jetë menjëherë, ndërsa drejtuesi i mjetit, i cili është arrestuar, ka deklaruar se ka pasur një probleme teknik në skaf.
Situata me mjetet lundruese është alarmante në vend, pasi në një periudhë të shkurtër kohore janë rregjistruar disa aksidente ku mjetet lundruese kanë goditur pushuesit në breg apo edhe në çadrat e tyre.
Pak ditë më parë policia kufitare në Sarandë bllokoi 3 mjete lundruese dhe gjobiti poseduesit e tyre për mungesë dokumentash.
Njoftimi i Policisë
Sot, rreth orës 14:00, në plazhin e Potamit, shtetasi A. T., duke drejtuar një mjet lundrues tip skaf, dyshohet se ka humbur kontrollin mbi drejtimin e mjetit lundrues dhe për pasojë mjeti lundrues ka goditur një fëmijë rreth 5 vjeç, i cili për shkak të dëmtimeve ka ndërruar jetë në vendngjarje.
Drejtuesi i mjetit lundrues është shoqëruar në Komisariatin e Policisë Himarë dhe po kryhen procedurat për arrestimin e tij.
Grupi hetimor ndodhet në vendngjarje dhe po punon për sqarimin e plotë të rrethanave të ngjarjes.
