Ditën e sotme deputeti i Parlamentit Europian, Angel Chavdarov Dzhambazki ka bërë një deklaratë të ashpër ndaj Serbisë në lidhje me situatën në Kosovë, pasi e ka parlajmëruar atë se do të digjet nëse luan me zjarrin.
Përmes një postimi në Twitter, deputeti shkruan: “Serbia po luan me zjarrin. Nëse Vuçiç nuk kontrollohet, ata do të digjen. Ne qëndrojmë me Kosovën.”
Reagimi i tij vjen 1 ditë pas tensioneve në veri të Kosovës, të shkaktuara nga marrëveshja për reciprocitetin e targave.
Çfarë ndodhi në veri
Qeveria e Kosovës vendosi reciprocitetin e targave për serbët që hyjnë në Koasovë. Sipas kësaj serbën në veri të Kosovës të cilët aktualisht qarkullojnë me targa serbe në automjetet e tyre janë të detyruar t’i kthejnë ato në targa kosovare. Qeveria e Kosovës e shtyu për një muaj vendimin për zbatimin e reciprocitetin ndaj Serbisë, për targat dhe dokumentet e identifikimit, kjo pasi serbët vendosën barrikada në rrugët që çojnë në dy pikë-kalimet kufitare me Serbinë – Jarinjë dhe Bërnjak. Shtyrja për implementimin e vendimit për reciprocitet me dokumente karshi Serbisë erdhi nga kërkesa e SHBA-së. Kjo kërkesë u përcoll nga ambasadori Jeff Hovenier, në një takim urgjent në orët e vona të 31 korrikut, me presidenten Osmani, kryeministrin Kurti dhe dy zv.kryeministrat, Bislimi dhe Gërvalla.
Policia konfirmoi se në veri pati të shtëna me armë zjarri dhe disa qytetarë u keqtrajtuan në kufi. Në disa vende policia tha se është shtënë edhe ndaj njësiteve policore, por që nuk ka asnjë të lënduar.
Në këtë situatë, dy pikat kufitare Bërnjak dhe Jarinje u bllokuan. Prandaj Ministria e Punëve të Jashtme dhe Diasporës i udhëzoi bashkatdhetarët që t’i përdorin pikë-kalimet e tjera kufitare për të hyrë në Kosovë.
