Gjithçka është bërë gati për protestën e paralajmëruar të ditës së sotme të opozitës së bashkuar, mirëpo masat janë duke u marrë jo vetëm nga organizatorët e protestës, por edhe nga Policia e Shtetit e cila ka për detyrë që të garantojë qetësinë publike.
Protesta e sotme ka një detaj të veçantë ndryshe nga ata të mëprashmit. Nëse gjithë protestat e tjera janë zhvilluar në mëngjes dhe para kryeministrisë, ditën e sotme ka ndryshuar 180 gradë, pasi orari fillimit është ora 18:00 dhe vendi gjithmonë para kryeministrisë.
Megjithatë nuk janë zbuluar detaje të rëndësishme të cilat lidhen më kohëzgjatjen, pra cili është plani i protestuesve për kohën që do të qëndrojnë në bulevard, por kjo mbetet për t’u zbuluar në orët në vazhdim.
Pikërisht për shkak të orës dhe vendit, Policia e Shtetit ka marrë masa të larta sigurie duke vendosur kamera sigurie, dronë, agjentë civilë, automjete të hedhjes së ujit, autoblinda për të monitoruar gjithçka dhe me leje për të ndërhyrë në rast se situata agravon.
Mirëpo masa më e fortë e marrë, janë 1500 efektivët e policisë të cilët do të jenë prezent gjatë zhvillimit të tubimit.
Tashmë që prej ditës së djeshme janë pastruar kamerat e sigurisë për të pasur një fokusim të qartë, për të shmangur ngjitjen e protestuesve, shtyllat janë lyer me graso, ndërsa u vendos mbrojtësja te dera e jashtme e Kryeministrisë, por edhe rrethimi me gardh metalik.
Gjithashtu për të gjithë ata që udhëtojnë me makina, do të jenë të bllokuara rrugët ‘Ismail Qemali’, ‘Ibrahim Rugova’të cilat kanë lidhje me bulevardin, ura e Lanës nga ministria e Brendshme deri tek Presidenca aty ku do të ndalohet dhe parkimi i mjeteve.
