Vendi po përballet me një rritje masive të çmimeve, ndërkohë që kryeministri Rama ka deklaruar shumë herë që jemi përballe një situate kritike me energjinë elektrike.
Ndërkohë që përgjatë seancës së sotme plenare Rama deklaroi se qeveria po mendon të veprojë me një plan të përkohshëm, ku familjet me më shumë të ardhura do të paguajnë më shumë.
Pra po merret në konsideratë që ata persona që kanë më shumë të ardhura të paguajnë më shumë në faturën e energjisë elektrike.
“Nuk do e rrisim çmimin e energjisë elektrike. Ndërkohë ministria e Energjisë po bën një studim për familjet e pasura, jo për të rikthyer fashat e tmerrshme që na çuan në katastrofë totale dhe na lanë në buzë të humnerës në vitin 2013 për të parë nëse mund të bëjmë një ndarje të përkohshme ku ata që kanë më shumë të paguajnë më shumë në energjinë elektrike. Asnjë familje të mos ketë kosto rritje për çmimin e energjisë. Po shikojmë një mundësi, për një periudhë të përkohshme, ku ata që kanë më shumë, të paguajnë më shumë për faturën e energjisë”, tha Rama.
Theksojmë që edhe pse Shqipëria ka mjaftueshëm burime për të shmangur krizën energjitike, dhjetëra HEC-e qëndrojnë të bllokuara.
Ritja e çmimeve në Shqipëri nuk ka të bëjë me një trend global të rritjes së çmimeve të energjisë, por me një keqmenaxhim të situatave të mëparshme që do të çonin në kriza të pashmangshme, siç është ajo që ka paralajmëruar kryeministri.
