Gjatë mbrëmjes së djeshme pranë Bashkisë së Tiranës u sulmua me molotov një makinë që sipas policisë i përkiste Drejtorit të Shërbimeve publike në Bashkinë e Tiranës, Taulant Tusha, drejtorit të tenderave dhe për më tepër personi më i afërt i kryetarit të Bashkisë së Tiranës, Erion Veliaj. Kjo deklaratë erdhi në fillim, por më pas Policia e Shtetit ndryshoi version duke deklaruar se makina e sulmuar me molotov nuk i përkiste Tushës, por UKT-së së Bashkisë Tiranë.
Njoftimi i Policisë shkruan se:
“Më datë 25.03.2022, në afërsi të Bashkisë Tiranë, një shtetas akoma i paidentifikuar që po lëvizte me biçikletë, ka hedhur një shishe, dyshohet me lëndë djegëse, poshtë mjetit të parkuar në pronësi të shtetasit T. T. Grupi hetimor nën drejtimin e Prokurorisë po punon për identifikimin dhe kapjen e autorit të dyshuar dhe sqarimin e rrethanave të ngjarjes”, njoftoi policia.
Sqarim
Në lidhje me informacionin paraprak të dhënë për ngjarjen e ndodhur pak më parë ku një shtetas ende i paidentifikuar, ka hedhur një shishe, dyshohet me lëndë djegëse, poshtë një automjeti, ju informojmë se: Pas verifikimeve të kryera, ka rezultuar që automjeti nuk është në pronësi të shtetasit T. T., por në pronësi të UKT-së Bashkisë Tiranë”.
Pas këtij versioni të ri, pyetja që lind është: “ Përse duhet sulmuar mjeti i UKT-së?” Mos vallë policia ka ndryshuar deklaratë me urdhër të dikujt? Janë shumë pyetje pas një ngjarje të paprecedentë si kjo që u regjistrua pranë Bashkisë së Tiranës ku çështja ka në thelb institucione dhe emra të rëndësishme, njerëz të afërt me Erion Veliajn.
