Një aksident i rëndë ka ndodhur ditën e sotme në një fshat të Fierit me pasojë vdekjen e një 67-vjeçari. Personi me iniciale H.M, banues në Vlorë duke drejtuar motomjetin ka aksidentuar me pasojë tragjike shtetasin Qerim Trokën, 67 vjeç.
Bëhet me dije se viktima ishte banues në Adë në Fier. Ngjarja ndodhi në fshatin Kafaraj të Fierit rreth orën 11:00. Drejtuesi i motomjetit është i plagosur dhe si pasojë është dërguar në spital, ku ndodhet nën kujdesin e mjekëve.
Ndërkohë që grupi hetimor po punon për zbardhjen e rrethanave të aksidentit.
Njoftimi i Policisë së Shtetit:
“Informacion paraprak
Sot rreth orës 11:10, në fshatin Kafaraj, shtetasi H. M., 46 vjeç, banues në Vlorë, duke drejtuar motomjetin ka aksidentuar me pasojë vdekjen shtetasin Q. T., 67 vjeç, banues në Adë, Fier. Drejtuesi i motomjetit është dërguar në spital dhe ndodhet nën kujdesin e mjekëve. Grupi hetimor po punon për zbardhjen e rrethanave të aksidentit.”
Vlen të theksojmë se vetëm gjatë vitit 2021 u shënuan mbi 1300 aksidente ku humbën jetën 197 persona, dhe u plagosën rreth 350 të tjerë. Ekspertët thonë se duhet përmirësuar sistemi që përgatit drejtuesit e mjeteve dhe krijuar një organizëm për mbikqyrjen e sigurisë rrugore.
Vetëm në harkun e një jave të fillimvitit policia e një qarku të vogël, siç është Gjirokastra, vendosi mbi 400 masa ndaj drejtuesve të mjeteve në shkelje të kodit rrugor. Sipas zyrtarëve vendorë kontrollet e shtuara policore synojnë të rrisin sigurinë rrugore.
