Të prekur nga projekti i “Unazës së Madhe” , banorët e zonës së Kombinatit, Paskuqanit, “5 majit” dhe Laprakës prej javësh kanë bërë rezistencë si dhe kanë zhvilluar protesta të shumta.
Ndërkohë që ditën e sotme ato kanë afatin e fundit për të zhvilluar një takim me kryeministrin Edi Rama. Në të kundërt ashtu sikurse kanë paralajmëruar në protestën e së dielës, ata do të futen në grevë urie. Kujtojmë se banorët kanë premtuar se nëse brenda 2 ditësh nuk kontaktohen për t’u sqaruar dhe për të marrë kontratat e nevojshme për dëmshpërblim, do të futen në grevë urie derisa problemi i tyre të marrë zgjidhje.
Por ky nuk ka qenë paralajmërimi i vetëm nga banorët, pasi disa prej tyre u shprehen se nëse nuk do të zbatohej kushtetuta për rastin e tyre, ata do të vinin në funksion “ligjet” e Kanunit. Rikujtojmë së për zonën “5 Maji” në Tiranë, aksioni i rradhëes nga IKMT për prishjen e banesave të tyre dot të jetë me datë 22 shkurt.
Nga ana tjetër banorët kërkojnë dëmshpërblim me çmimin e tregut ose përfitim të të njëjtave metra katrorë që kanë pasur në pronësi. Në të gjitha daljet publike të zyrtarëve të Bashkisë së Tiranës, pretendohet se banorët do të marrin atë që i takon, por nuk kanë asnjë të dhënë të shënuar në kontratë, që është regjistruar si “dhurim me detyrim”, klauzolë që nuk ekziston në Kodin Civil e në asnjë ligj tjetër të vendit.
