Mbrëmjen e kaluar, zjarri ka përfshirë një godinë në Bulqizë. Zjarri ka shkrumbuar plotësisht një godinë banimi në lagjen e vjetër të Bulqizës, duke lënë në “qiell të hapur” 4 familje. Ndërkohë një prej katër kryefamiljarëve që strehoheshin në banesën e djegur në Bulqizë, Nuredin Jangulli ka rrëfyer momentin se si e ka marrë vesh lajmin.
Ai është shprehur se në momentin e zjarrit nuk ndodhej në shtëpi, pasi ishte turni i tretë në punë. Por shtoi se familjen ia kishte shpëtuar fqinji pasi i kishte nxjerrë me urgjencë jashtë.
“Unë isha turn i tretë. Kur më njoftuan dhe erdha më thanë se ka ardhur komshiu dhe mi ka nxjerrë familjarët nga shtëpia. I ka thënë ‘dilni se po digjet shtëpi’. Gjithçka është shkrumbuar këtu. Këtu jetojnë 4 familje. Për momentin fëmijët i kam çuar te njerëzit e mi. Gocën e kam 8-muajshe dhe çunin e kam 8 vjeç,”-tha ai.
Kujtojmë që flakët kanë nisur gjatë mbrëmjes së djeshme, por nuk dihen më detaje të tjera lidhur me ngjarjen, ndërsa mungon edhe një njoftim zyrtar nga autoritetet përkatëse.
Ndërhyrja e zjarrfikësve nuk ka mundur ta vërë nën kontrolloj zjarrin e madh, i cili dogji gjithçka. Policia ka nisur hetimet për rastin në fjalë, por ende nuk ka një pistë të shkaqeve të rënies së zjarrit.
