Në aksin Librazhd-Elbasan ka ndodhur një ngjarje e rëndë, pasi një makinë, në të cilën ndodheshin shumë njerëz ka dalë nga rruga dhë si pasojë ka rënë në lumin Shkumbin.
Bëhet me dije se është shënuar një viktimë nga aksidenti. Deri më tani janë nxjerrë nga mjeti 3 persona, 1 burrë, 1 grua dhe një fëmijë i moshës 9 vjeç. Vogëlushi ndodhet në gjendje të rënduar dhe është drejtuar për në Spitalin Nënë Tereza në kryeqytet, për t’iu nënshtruar një ndërhyrjeje. Sakaq, bëhet e ditur se ende ndodhen 2 persona të mbyllur brenda në makinë.
Mjeti ndodhet 4 metra nën thellësinë e ujit dhe shanset që ato të dalin të gjallë janë të pakta, pasi nxjerrja e tyre në një kohë të shpejtë është tepër e vështirë.
Në vendngjarje ndodhen shërbimet e policisë Elbasan dhe shërbimet e zjarrfikseve dhe po punohet për nxjerrjen e drejtuesit të mjetit dhe të pasagjerëve.
Ndërkohë grupi hetimor po punon për zbardhjen e rrethanave të aksidentit.
“Rreth orës 09:10, në aksin rrugor Elbasan-Librazhd, vendi “Kthesa e Murrashit” , ka dalë një mjet nga rruga dhe për pasojë ka rënë në Lumin Shkumbin. Në vendngjarje ndodhen shërbimet e policisë Elbasan dhe shërbimet e zjarrfikseve dhe po punohet për nxjerrjen e drejtuesit të mjetit dhe të pasagjerëve. Grupi hetimor po punon për zbardhjen e rrethanave të aksidentit”, thuhej më herët ne njoftimin e Policisë së Shtetit.
