Në fshatin Drobonik të Beratit ka ndodhur një aksdient i rëndë me pasojë plagosjen e një familjeje.
Fuoristrada tip ‘Mitsubishi’ ka rrëshqitur duke zbritur drejt Beratit dhe ka rënë nga një lartësi rreth 20 metër. Për pasojë, kanë mbetur të plagosur lehtë drejtuesi i mjetit Renato Kola 25-vjeç, mirëpo në gjendje më të rëndë janë prindërit e tij.
Dyshohet se shkak për këtë aksident të jetë bërë ngrica në rrugë, që ka sjellë edhe rrëshqitjen e mjetit, që sipas policisë ka qenë me shpejtësi dhe nuk ka mundur të kontrollojë lëvizjen.
Të plagosurit janë transportuar drejt Spitalit Rajonal Berat, ku ndodhen nën kujdesin e mjekëve, me plagë të shumta në trup. Në vendngjarje kanë shkuar forca të shumta policie,të cilët kryejnë këqyrjen e vendit të aksidentit dhe po punojnë për zbardhjen e shkaqeve të tij.
Kujtojmë që kufizimet e lëvizjes gjatë pandemisë nuk e ulën numrin e aksidenteve rrugore në Shqipëri. Vetëm gjatë vitit 2021 u shënuan mbi 1300 aksidente ku humbën jetën 197 persona, dhe u plagosën rreth 350 të tjerë. Ekspertët thonë se duhet përmirësuar sistemi që përgatit drejtuesit e mjeteve dhe krijuar një organizëm për mbikqyrjen e sigurisë rrugore.
Vetëm në harkun e një jave të fillimvitit policia e një qarku të vogël, siç është Gjirokastra, vendosi mbi 400 masa ndaj drejtuesve të mjeteve në shkelje të kodit rrugor. Sipas zyrtarëve vendorë kontrollet e shtuara policore synojnë të rrisin sigurinë rrugore.
Të dhënat zyrtare dëshmojnë se kufizimet e pandemisë së koronavirusit, përmirësimet ligjore në kodin rrugor dhe ndëshkimet më të ashpra për raste e shkeljeve nga drejtuesit e mjeteve nuk e ulën numrin e aksidenteve rrugore në Shqipëri.
