Pasi Bashkia e Tiranës njoftoi se do të kërkojë hetim kombëtar dhe ndërkombëtar për Armand Dukën, bizneset dhe pasuritë e familjes Duka u futën në sitën e administratës tatimore. Me kërkesë të Bashkisë së Tiranës, zyrtarët nga tatimet zbarkuan në bizneset e familjes Duka për inspektim. Vëllai i kreut të FSHF, deputeti Agron Duka, deklaroi se deklaratat e Veliajt janë një fyerje për familjen e tij e sidomos për Armand Dukën.
Agron Duka:
Këtu sot janë ardhur nja 15 veta nga hetimi Tatimor. Duket se është e qëllimshme sepse pas deklaratave të Erion Veliajt, u sulën ndaj FSHF. Deklarata e Veliajt është shumë fyese për ne si familje, për vetë Armandon. Duket një instrument shumë i dobët shumë i ndryrë. Nuk është kjo mënyra për me marrë institucionet e federatës. Janë zgjedhjet. Duke parë që me zgjedhje nuk e mundin dot kanë filluar punë me kërcënime, që nuk e di se sa do vazhdojnë. Ne s’kemi siguri për jetën. Nuk kam gjë me njerëzit që kanë ardhur nga tatimet
Ndërkohë sot ka reaguar Ministrja e Financave dhe Ekonomisë, Delina Ibrahimaj. Sipas saj, kontrolli i administratës tatimore në biznesin e Agron Dukës, ishte rastësi. Ndonëse kontrolli erdhi pas tensioneve të veliajt dhe Armand Dukës, ministrja e Ramës di si të heqë vëmendjen nga skandalet e Lali Erit.
Delina Ibrahimaj:
Në fakt administrata tatimore funksionon në bazë të ligjeve dhe procedurave tatimore. Rasti në fjalë është rastësi që ndodh pikërisht në këtë moment, pasi vjen në zbatim të një denoncimi dhe një sërë denoncimesh të ardhura, të cilat administrata shtetërore duhet t’i verifikojë brenda një afati 7 ditor.
