Mbrëmjen e djeshme në portën e shtëpisë së kreut të FSHF-së, Armand Duka ka ndodhur një shpërthim me tritol.
Ndërkohë nuk kanë munguar reagimet mbi këtë ngjarje nga homologët e tij në Kosovë dhe Maqedoninë e Veriut.
Kreu i Federatës së futbollit të Kosovës është shprehur se është i tronditur nga lajmi, që sipas tij përbën një ngjarje tepër të rëndë për futbollin shqiptar.
Agim Ademi (Keu i Federatës së Futbollit të Kosovës)
I tronditur me lajmin që mbrëmë vonë është sulmuar me tritol shtëpia e presidentit të FSHF-së, Armand Duka në Durrës.
Akti i tillë kriminal e i shëmtuar përveç se ka shkaktuar frikë e tronditje në familjen Duka, pa dyshim është një ngjarje e rëndë edhe për futbollin shqiptar dhe Shqipërinë si shtet në përgjithësi, veçmas duke pasur parasysh faktin se z. Duka është edhe anëtar i KE të UEFA-s.
Fatmirësisht miku im Armand Duka dhe familja e tij janë mirë dhe kanë kaluar pa pasoja nga ky akt i njerëzve të ligë.
Familjes së tij i ofroj tërë mbështetjen time dhe të komunitetit të futbollit kosovar, me shpresë që kryerësit e këtij akti të vihen para drejtësisë dhe në të ardhmen të mos ballafaqohet me ngjarje të tilla.
Po në një postim në Facebook, Muamed Sejdini, kreu i Federatës së Futbollit në Maqedoninë e Veriut, shkruan se nuk dëshiron të mendojë se kjo ka lidhje me aksion e fundit të politikës shqiptare kundër Dukës, por ai shtoi se dëmi i imazhit është tepër i madh.
Muamed Sejdini (Keu i Federatës së Futbollit së Maqedonisë së Veriut)
Shpërthimi para shtëpisë së Armando Dukës, një akt i shëmtuar
Nuk dua të mendoj me konspiracion për një lidhje ndërmjet aksioneve të fundit të njerëzve të politikës dhe shpërthimit me tritol para shtëpisë së presidentit të FSHF-së, por nuk qëndroj dot indiferent ndaj një veprimi të tillë të shëmtuar. Mbrëmë në fakt u sulmua Anëtari i Komitetit Egzekutiv të UEFA-së, njeriu që mes tjerash bëri që Tirana këtë vit të paktën për një ditë të jetë qendra e futbollit europian me pritjen e finales së Conference League. Impaktit që kjo ndeshje do t’i jep Tiranës dhe Shqipërisë, sigurisht nuk i bëjnë nder aktet si ky i mbrëmshmi.
E mira e vetme e gjithë këtij akti të shëmtuar është se gjithçka kaloi pa lëndime e as që dua ta mendoj, larg qoftë të kishte viktima në njerëz.
Por dëmi gjithsesi se është i madh, posaçërisht nëse llogarisim me syrin e çdo qytetari jashta Shqipërisë e që në aktin e mbrëmshëm shikojnë sulm ndaj futbollit shqiptar.
