Gjatë regjimit Komunist, të Enver Hoxhës, çdo gjë raportohej me përpikmëri në parti dhe për të gjithë këtë skemë, partia e diktatorit Hoxha, kishte shpërndarë ‘spiun’ në çdo cep të Shqipërisë.
Nëse dikur spiunët e xhaxhit Enver rrinin duke dëgjuar pas shpine, për të mësuar adresën e shtëpisë, rrogën dhe shumë informacione të tjera, sot nuk është nevoja për këta tipa, pasi të dhënat personale të çdo shqiptari, dalin dhe qarkullojnë lirshëm kudo në rrjet dhe fajtori mbetet sërish jetim.
E ndonëse gjithë të dhënat personale të shqiptarëve, janë të regjistruar tek AKSHI e Mirlinda Karçanajt, kjo e fundit deklaron se të dhënat në e-Albania janë të sigurta edhe pse ID, numri i telefonit, vendi ku punon, dhe rroga e shqiptarëve kanë dalë ‘sheshit’. Por në fakt, ky nuk është skandali i vetëm në vendin tonë. Edhe pse po jetojmë në demokraci, ende kanë mbetur ‘sozitë’ e Enveri Hoxhës, por disi pak më me stil.
Patronazhistët është një tjetër ‘perlë’ më vete e qeverisë, e cila bëri jo pak bujë në vendin tonë dhe kjo pak para zgjedhjeve të 25 Prillit. Në kohën e komunizmit, Enver Hoxha ndihej krenar dhe i shpërblente të gjithë spiunat që raportonin tek ai, teksa sot qeveria ndihet krenare për patronazhistët, ndërsa i dhimbset të shkarkojë kreun e institucionit që nuk u kujdes siç duhet për të dhënat tona dhe lejoi që të bëhen transparente çdo gjë personale e çdo shtetasi shqiptar.
