Ministrja e Shëndetësisë dhe Mbrojtjes Sociale, Ogerta Manastirliu iu ka bërë sërish apel të gjithë studentëve që të vaksinohen. Me anë të një postimi në rrjetet sociale Manastirliu, ka ftuar të gjithë studentët që nuk janë vaksinuar që të shfrytëzojnë këtë javë të vaksinimit të hapur, që të vaksinohen në qendrat e ngritura afër fakulteteve, për të mbrojtur veten por edhe të tjerët rreth tyre.
“Një ftesë për çdo student që ende nuk është vaksinuar, të shfrytëzojë këtë javë të vaksinimit të studentëve pranë fakulteteve, për të mbrojtur veten por edhe si një detyrim moral e përgjegjësi qytetare për mbrojtjen e shëndetit të gjithsecilit
JetaJoteVLEN
#VAKSINOHU”, shkruan Manastirliu.
Kujtojmë se edhe tetori do të jetë muaji i hapur i vaksinimit dhe të gjithë studentët, por edhe personat mbi 18 vjeç mund të vaksinohen në qendrën më të afërt vetëm me kartën e identitetit.
Po ashtu në dyert e fakulteteve të gjitha ekipet e vaksinimit do të jenë në pritje të studentëve që të vaksinohen në mënyrë që viti i ri akademik të fillojë me sa më shumë studentë që kanë kryer vaksinën anticovid.
Bëhet me dije se ditën e sotme ekipi i vaksinatorëve është vendosur në Fakultetin e Stomatologjisë, Universitetin e Sporteve dhe atë të Arteve në Tiranë, në Godinën e Rektoratit dhe tek Fakulteti i Shkencave të Natyrës në Shkodër, tek Godina e Rektoratit dhe tek Fakulteti i Shkencave Humane në Vlorë, në hollin e Universitetit “Eqerem Çabej” në Gjirokastër, pika pranë Universitetit “Aleksandër Moisiu” në Durrës, Fakulteti i Mjekësisë dhe Infermierisë në Korçë, Korpusi kryesor i Universitetit dhe Fakulteti Shkencave Teknike Mjekësore në Elbasan.
