Kryeministri i vendit, Edi Rama, gjatë një interviste për median spanjolle “El Pais” ka deklaruar se Shqipëria nuk ka ndonjë pritshmëri të lartë në lidhje me samitin e mbajtur ditën e sotme në Slloveni.
“Ne kemi mësuar rrugën e vështirë për të mos pritur asgjë, sepse kemi parë që Evropa nuk është në një moment shumë të mirë, me shumë probleme të brendshme dhe zgjerimi nuk pritet me entuzizëm”, është shprehur Rama për samitin.
Duke komentuar vizitën e Presidentes së Komisionit Evropian në Tiranë dhe deklaratat e saj se do të punojnë për zhbllokimin e procesit këtë vit, kryeministri Rama u shpreh se “Ne kemi dëgjuar fjalë për shumë vite dhe asgjë nuk ka ndryshuar. Von der Leyen flet në emër të Komisionit, por Komisioni është një gjë, Këshilli është një tjetër, fjalët e bukura janë një gjë, faktet një tjetër… Në këtë proces ka pasur gjithmonë një, dy, tre shtete anëtare që janë kundër. Tani është Bullgaria, kështu që për ne është më mirë të mos presim, sepse kur prisni, duhet të ndjeni turpin e refuzimit”.
Më tej, kryeministri Rama këmbëngul se integrimi i Shqipërisë në BE është një “nevojë” dhe se nuk ka alternativë tjetër. “Evropa është zgjedhja jonë dhe feja jonë”, thekson ai, duke shtuar se “jo sepse na kërkohet, por sepse është e ardhmja jonë. Atëherë, ajo që ndodh në Bruksel nuk varet nga ne as nuk më shqetëson mua. Unë nuk jam pesimist, por nuk dua të humbas më shumë energji duke u ankuar”.
