Kryeministri i vendit Edi Rama ishte ditën e sotme në Prishtinë, ku dhe mbajti një konferencë për shtyp të përbashkët me homologun e tij Albin Kurti.
Një nga gazetarët e pyeti Ramën në qoftë se ka pasur bisedime me Vuçiçin, pas situatës së agravuar në Veri të Kosovës. Kryeministri ka thënë se nuk ka pasur asnjë bisedim me Vuçiçin, pasi sipas tij nuk ka asgjë për t’u ndërmjetësuar pasi e drejta është me Kosovën.
“Nuk kam pasur një bisedë me Vuçiç. Apo si shpesh herë shqiptarët nga Kosova në rrjetet sociale thonë “me vëllaun tim Vuçiç”. Sepse këtu nuk ka asgjë për të ndërmjetësuar sepse e drejta është me Kosovën. Ne jemi në krah të Kosovës. Leximi i njësive speciale si një arsye për të bërë teatër në Serbi është i gabuar. Ta përfytyrojë edhe vëllau jem atje.
I takon Kurtit të marrë vendimet e duhura për të çuar përpara dialogun. Unë e kam mbështetur si një klithëm të drejtë për të shtruar një problem të drejtë për mosrespektimin nga Serbia. Ajo tarifë u kthye në litar në këmbët e Kosovës sepse kaloi në një problem më të madh se vetë problem.
Albini dhe të gjithë kolegët këtu e kanë largpamësinë për të shmangur një gjë të tillë. Ato djegiet e institucioneve nuk i provokojnë forcat legjitime të qeverisë së Kosovës por marrja peng e serbëve në Kosovë në kushtet e një dialogu që nuk ecën ashtu si duhet. Jam i bindur që dialogu është e vetmja rrugë. Çfarë do ambasadori rus? Imagjinoni që ambasadori amerikan të shkonte në kufi. Ky është një teatër. Është shkrepësja që ndez institucionet”, tha Rama.
