Kryeministri Albin Kurti ka thënë në konferencën për mediat se sot në mëngjes ka pritur gjeneralin e përgjithshëm të KFOR-it dhe tha se bashkë me ministrat është në kontakt të vazhduesëhm me partnerët ndërkombëtar, për tensionet në kufirin me Serbinë. Kurti ka thënë se Njësia Speciale nuk është në kufi për të treguar forcën, por për të mbrojtur.
Kryeministri i Kosovës deklaroi se ka bërë propozimin që të mos ketë targa të përkohshme për asnjë nga vendet, në mënyrë që qytetarët të lëvizin lirisht.
“Sot në mëngjes kam pritur gjeneralin e përgjithshëm të KFOR-it dhe bashkë me ministrat jemi në konktakt të vazhdueshëm me partnerët tanë. Njësia speciale e jona nuk është në kufi që ne të kënaqemi. Ata janë ata me detyrë. kemi informacione se nëse forcat tona nuk do ishin në kufi, policët tanë dhe godinat tona do ishin të rrezikuara.
Ka kaluar shifra prej 10 mijë automjeteve që kanë kaluar në Kosovë pas asnjë incident. Ku ka polici të Kosovës nuk ka probleme. Dhuna ka adresë tjetër, kurrsesi jo ne. Policia e Kosovës është tejet profesionale dhe korrekte. U jam mirënjohës për punën që kanë bërë. Kemi bërë një ofertë ku kemi thënë se nuk ja vlen të kemi targa të përkohshme për asnjërin nga ne. Ne kemi thënë ti heqim targat e përkohshme ata të vijë lirisht dhe ne të shkojmë lirisht.
Njësia speciale e Kosovës nuk ndodhet aty për të treguar forcën por për të mbrojtur. E keni vërejtur që unë asnjëherë gjatë këtyre ditëve nuk jam shfaqur me ministrin e mbrojtjes ndërsa ata e sjellin këtu në kufi ministrin e tyre”, tha Kurti.
