Një tërmet i fortë me magnitudë 5.8 tronditi ishullin e Kretës në Greqinë jugore të hënën, tha Instituti Gjeodinamik i Athinës, duke bërë që njerëzit të dalin jashtë shtëpive dhe ndërtesave të tyre.
Një person ka humbur jetën si pasojë tërmetit, sipas AFP, e cila citon televizionin publik. Dy persona u bllokuan në ndërtesa të dëmtuara, thanë autoritetet.
Më herët Qendra Sizmologjike Evropiane Mesdhetare (EMSC) tha se tërmeti arriti një magnitudë prej 6.5, ndërsa Shërbimi Gjeologjik i Shteteve të Bashkuara (USGS) e vendosi atë në 6.0. Epiqendra e tërmetit ishte 23 kilometra në veriperëndim të Arvi në një thellësi prej 10 kilometrash, tha instituti në Athinë.
Kryetari i fshatit Arkalohori i tha Skai TV se dy kisha dhe ndërtesa të tjera në fshat ishin dëmtuar dhe dy persona ishin bllokuar, njëra në një kishë ku kupola u shemb gjatë punës së mirëmbajtjes, dhe një tjetër në një shtëpi.
Tërmeti kishte një thellësi prej 2 km tha EMSC. Tërmete të tjera të vogla vazhduan të godasin ishullin më pas. Kjo përfshin një tërmet me magnitudë 3.7 dhe një madhësi tjetër 4.8, sipas EMSC. Më vonë, një tërmet i katërt me magnitudë 3.0 u ndje në Kretë, i ndjekur nga një tjetër. Tërmetet thuhet se janë ndjerë edhe në Athinë dhe në Izmir, Turqi, sipas EMSC.
