Portieri italian, Gigio Donnarumma, ka rrëfyer për “Corriere dello Sport” arsyet e largimit nga Milani, pasi vendosi të firmosë me PSG-në. Një lamtumirë e hidhur sipas tifozëve, por fjalët e portierit tregojnë ambiciet që ka dhe projektin me klubin francez.
“Nuk do të doja të flisja për sezonin e kaluar, nuk do të kishte kuptim, le ta ndryshojmë temën. Kam kaluar tetë vjet në Milano, ishte shtëpia ime, kam jetuar momente të mrekullueshme atje. Milan akoma më emocionon, kam respekt të madh. Për njerëzit që punojnë atje dhe për tifozët. Kur mësova se drejtori Gazidis ishte i sëmurë, i shkrova atij duke i uruar që të kthehej shpejt në Milanello.
Problemi është që unë kisha ambicie dhe synime të kundërta me klubin.Unë gjithmonë do të jem një tifoz i Milanit. Kur firmosa, presidenti më tha ‘ne jemi më në fund së bashku’. Tani jam mirë, jam shumë i qetë, vitin e kaluar skuadra nuk e fitoi Ligue 1, por objektivi i vërtetë është një tjetër, Champions League.
Interesimi në të shkuarën? PSG më ka kërkuar gjithmonë, por në atë moment përparësia ishte Milan. Sot, gjithashtu falë Milanit, ndihem më i sigurt, i pjekur dhe jam përmirësuar teknikisht. Messi? është e pabesueshme, kur u bë e ditur për lamtumirën e tij te Barcelona nuk mund ta imagjinoja se do ta gjeja këtu, ky është një ekip fenomenesh. Messi tashmë po stërvitet me ne, nuk e imagjinoj dot”, përfundoi gjiganti i portës.
