Prokuroria e Posaçme Anti-Korrupsion ka zgjatur me një muaj hetimet për ish-gjyqtaren e Krujës Enkeleda Hoxha si dhe avokatin Aldo Tabaku. Po të njëjtin vendim ka marrë edhe për sekretaren e gjykatës Emanuela Nallkuçi, Gazmit e Gentian Nezën, Isuf Tanuzin, Bledar e Saimir Petanin si dhe Trëndafilen Frangun dhe Migena Skënderin.
Sipas SPAK, Enkeleida Hoxha dhe avokati Aldo Tabaku duke bashkëpunuar edhe me persona të tjerë të implikuar ne dosje, janë përfshirë në nje skemë kriminale të favorizimit dhe lirimit të të burgosurve nga Gjykata e Krujës. Sjellim në vëmendje se Apeli i refuzoi për herë të tretë kërkesën për liri ish-Gjyqtares Hoxha.
Arrestimi i ish-gjyqtares së Krujës
Enkelejda Hoxha u arrestua më 11 shkurt 2021, me urdhër të SPAK (Prokuroria e Posaçme Kundër Krimit të Organizuar dhe Korrupsionit) .
Sipas ILD, gjyqtarja e Krujës kishte dhënë 6 vendime në harkun kohor të maj 2017- nëntor 2019 që përbëjnë akte që diskreditojnë figurën e gjyqtarit.
Enkeleida Hoxha njihet si gjyqëtare që jep vendime në favor të të dënuarve për krime të rënda, si brenda dhe jashtë vendit.
Më 7 nëntor të vitit 2017, Enkeleida Hoxha liroi nga burgu Genci Tafilin, vëllanë e Admir Tafilit, të dy emra shumë të njohur për drejtësinë shqiptare, të akuzuar dhe dënuar për disa vepra penale.
Genc Tafili është liruar në vitin 2017 me kusht nga Gjykata e Krujës nga gjyqtarja Enkeleida Hoxha, pasi kreu 17 vite burg.
Po në nëntor të 2017-ës,gjyqtarja Enkeleida Hoxha liroi edhe Ilir Pajën nga burgu, të njohur me nofkën “UFO” nga drejtësia italiane, pasi ishte arratisur tri herë.
