Presidenti francez Emmanuel Macron ka ndërruar numrin dhe telefonin cellular, pasi ai mund të jetë një prej liderëve që kanë rënë pre e përgjimit të programit “Pegasus”. Lajmin e ka konfirmuar vetë një zyrtar i presidencës franceze, ndërsa ky është një nga veprimet e para konkrete që është njftuar në lidhje me skandalin.
“Ai ka disa numra telefoni. Kjo nuk do të thotë se ai është spiunuar. Është vetëm siguri shtesë”, tha zyrtari në fjalë për Reuters.
Zëdhënësi i qeverisë Gabriel Attal tha se protokollet e sigurisë së presidentit po adaptoheshin në dritën e incidentit.
“Padyshim që ne po e marrim këtë shumë seriozisht”, u tha Attal gazetarëve disa orë pas një takimi urgjent të kabinetit të përqendruar në akuzat e Pegasus.
Gazeta franceze “Le Monde dhe “Radio France” raportuan të martën se telefoni i Macron ka qenë nën shënjestrën e përgjimit të programit “Pegasus” në llogari të mundshme për Marokun. Megjithatë mediat thanë se nuk kishin qasje në telefonin e Macron dhe nuk mund ta verifikonin nëse ai ishte vërtetë një nga personat e përgjuar. Ndërkohë Maroku i ka hedhur poshtë këto akuza.
Skandali i përgjimeve që lidhet me programin programin e përgjimeve “Pegasus”, i hartuar nga kompania izraelite NHO, përfshinë rreth 50 mijë numra, mes të cilëve edhe 14 liderë botërorë, emrat e të cilëve nuk janë bërë me dije.
