Prokurorit të Vlorës, Maksim Sota, i është sekuestruar një automjet nga SPAK. Burime bëjnë me dije se ka dyshime që automjetin, prokurorit të ja kenë blerë trafikantët e drogës. Prokurori Maksim Sota ka apeluar masën e sekuestros dhe ka kërkuar që t’i kthehet mjeti i sekuestruar.
Seanca gjyqësore për këtë çështje do të zhvillohet më datë 27 korrik. Maksim Sotës ju vendosën prangat gjatë operacionit të koduar “Shpirti”, së bashku me 28 të dyshuar të tjerë. Gjykata e Posaçme Kundër Korrupsionit dhe Krimit të Organizuar (SPAK) ka caktuar për Sotën masën e sigurisë “arrest në shtëpi”.
Njëri nga bashkëpunëtorët e drejtësisë tregoi se Maksim Sota kishte qëndruar në të njëjtën shtëpi me Ilirjan Duçellarin, kreun e grupit kriminal që merrej me trafikimin e drogës. Sipas bashkëpunëtorit të drejtësisë, Sota ishte angazhuar për të ndihmuar Duçellarin që të zgjidhte problemet me drejtësinë.
SPAK ka dyshime se prokurori ka ndikuar tek vartësit që të favorizonin grupin kriminal të Ilirjan Duçellarit, por nuk ka prova konkrete për këtë çështje. Burime nga SPAK bëjnë me dije për Gazetën Reforma se në shtator, ata do t’i drejtohen Gjykatës me kërkesë për të vënë nën sekuestro pasuritë e te gjithë personave të përfshirë në trafikimin e lëndëve narkotike. Gjatë operacionit “Shpirti”, u ekzekutuan 18 masa sigurie, ndërkohe 10 të tjerë janë të shpallur në kërkim ndërkombëtar.
