Kryeministri Edi Rama nuk ka humbur kohë të reagojë për arrestimin e kryetarit të Bashkisë së Lushnjës, Fatos Tushe. Ai ka zgjedhur Twitter-n për të thënë se Tushe nuk e gëzon mbështetjen e PS, pasi kjo nuk mund të bëhet mbulesë e askujt për interes apo faj vetjak. Rama thotë se kryetari i Bashkisë së Lushnjës dhe kushdo i akuzuar nga drejtësia, duhet të përgjigjet vetë para drejtësisë me avokatët e gojën e tyre.
Reagimi i Ramës:
Çdo zgjedhës duhet ta dijë se besnikëria jonë ndaj tij nuk varet nga asnjë individ, po është flamur beteje i PS për ta bërë Shqipërinë të ardhmen tonë dhe çdo i zgjedhur nuk duhet ta harrojë se flamuri i PS s’mund të bëhet mbulesa e askujt, për asnjë interes apo faj vetjak.
Kryetari i Bashkisë së Lushnjës dhe cilido tjetër i akuzuar nga drejtësia në këtë rast apo në çdo rast, nuk do të ketë asnjë mbrojtje nga Partia Socialiste e duhet të përgjigjen vetë para drejtësisë, me avokatët e tyre e me gojën e tyre! PS u shërben zgjedhësve jo të zgjedhurve.
Fatos Tushe u arrestua ditën e sotme me urdhër të SPAK nga forcat RENEA, pasi ka dyshime për korrupsion dhe shpërdorim detyre. Detaje të tjera nga operacioni pritet të bëhen të ditura.
