Shumë prej atyre artistëve të mëdhenj që i kaun dhënë emër Shqipërisë, sot ose janë të harruar tërësisht ose gjenden në situatë kritike për jetën.
Pikërisht kjo është situata e këngëtarit të madh, “Artistit të Merituar”, Shyqyri Allushi. Alushi është konsideruar si një prej zërave më përfaqësues të këngës popullore qytetare shkodrane, mirëpo sot ndodhet në gjendje të rëndë shëndetësore dhe mesa duket i mungojnë edhe ilaçet.
Artisin e mirënjohur e ka kthyer në vëmendje pikërisht Luan Rama i cili nëpërmjet një statusi në rrjetin e tij social, Facebook, ka sqaruar situatën në të cilën Allushi ndodhet sot dhe i bën thirrje qeverisë që të lëvizë dhe ta ndihmojë këtë ikonë të këngës popullore shkodrane.
Reagimi i plotë i ish-deputetit:
Shyqyri Alushi, “Artisti i merituar” dhe zëri më përfaqësues i këngës popullore qytetare shkodrane pas Bik Ndojës së paharruar, gjendet i vetmuar përballë shëndetësisë falas dhe indiferencës së qeverisë!
Natyrisht, zonja ministre e kulturës dhe shumë prej kolegëve të saj mund të pyesin se “kush është ky Shyqyri Alushi?!”, por më shumë se ky fakt, problemi është që institucionet tona të kulturës e ato të vlerësimit e nderimit të artistëve, nuk kanë e nuk respektojnë kritere profesionale e shkencore për hierarkinë e vlerave në këtë vend!
Një jetë të tërë, përmes këngës së vet, Shyqyri Alushi iu fal popullit të tij me shpirt e zemër, duke qenë një model i qytetarit artist dhe artistit qytetar.
E kur duhej që të ndjente bashkë me dashurinë dhe respektin e qytetarëve shkodranë dhe atyre të të gjithë vendin që asnjëherë nuk i ka munguar edhe vëmendjen, respektin dhe mirënjohjen e shtetit, shëndetësia “falas” dhe qeveria e rilindjes, jo vetëm e ka braktisur artistin fisnik, por edhe po e vret atë me indiferencën e vet!
Unë lutem me shpirt dhe uroj me zemër që Shyqyri Alushi t’a fitojë betejën me sëmundjen dhe të kthehet në familjen e tij për të qenë gëzimi dhe krenaria e tyre e, edhe e jona, po për fat të keq, ai ka përballë bashkë me sëmundjen, edhe shendetësinë “falas” pa ilaçe dhe medikamente, ka përballë edhe indiferencën e qeverisë e të shtetit, i cili nuk kursehet duke shpërblyer e nderuar përfaqësues antivlerash e mediokritetesh perverse, që gëlojnë dhe ushqehen për të gajasur e duartrokitur duke u mbllaçitur e gogësitur korridoreve të pushtetit!
