Rivali i Lulzim Bashës në zgjedhjet e 13 qershorit brenda PD-së, Fatbardh Kadilli ka pranuar legitimitetin e kryetarit që u rizgjodh.
I ftuar në emisionin “Çim Peka Live” në Syri Tv, Kadilli tha se ai do ta kishte uruar Bashën po të ishte një garë e barabartë. Ai deklaroi se Basha ka përdorur administratën e partisë, ekipet e PR-së që vinin nga jashtë dhe gjithë logjistikën. Gjithsesi Kadilli pranoi se Basha është legjitim, sepse e kanë votuar 80% e atyre që morën pjesë në garë. Ndër të tjera, Kadilli ka treguar se ditën e fundit janë shpërndarë SMS që të votohej për kryetarin tashmë të rizgjedhur të Partisë Demokratike.
“Do ta kisha uruar Bashën po të ishte një garë e barabartë. Basha të paktën para katër vitesh ngriu funksionet e veta, këtë herë as nuk i ngriu. Përdori të gjithë administratën e partisë edhe ekipet e Piarit që vinin nga jashtë, si edhe të gjithë logjistikën. Që në fillim e mora vesh. Legjitim është patjetër. Përderisa e voton 80 përqind e atyre që morën pjesë në garë. Nëse do ishte në kushte të barabarta do e kisha uruar. Ditën e fundit shpëndanin sms që hajdeni votoni kryetarin. Unë nuk ankohem për parregullsi, por pabarazia është pabarazi,”- tha Kadilli.
