Data 2 mars është një nga datat më të rëndësishme në Lezhë dhe kjo sepse gjithë diaspora mblidhet për të festuar për Heroin tonë Kombëtar Gjergj Kastriotin. Megjithatë edhe këtë vit duket se shtatorja e heroit nuk do të jetë në vendin që i takon dhe kjo për shkak të disa burokracive dhe lejeve që nuk janë marrë nga Bashkia.
Punimet për vendosjen e shtatores së heroit tonë kombëtar Gjergj Kastriot janë ndërprerë në mes, pasi Bashkia e Lezhës nuk ka marrë leje për vendosjen e kësaj shtatoreje.
Në komunikimin e bërë me drejtorin e IKMT, Fran Mataj ka bërë me dije se Bashkia e Lezhë ka nisur kërkesën për leje në ditën që kishin nisur punimet, mirëpo Këshilli Kombëtar i Monumenteve ka vendosur pezullimin e punimeve. Fran Frrokaj, kryebashkiak i Lezhës, bën me dije se ndërprerja e punimeve është e padrejtë.
Mirëpo fakt është që me pezullimin e punimeve Lezha do të mirëpresë diasporën pa Gjergj Kastriotin dhe kjo për shkak të një lejeje.
Kërkesa
Lënda Kërkesë për miratim të projektit
Drejtuar Znj. Arta Dollanj.
E nderuar
Me rastin e 575-vjetorit të ‘Kuvendit të Besëlidhjes së Lezhës’, së mbajtur më 2 mars 1444, Bashkia Lezhë ka planifikuar vendosjen e shtatores së Heroit kombëtar Gjergj Kastrioti-Skëndërbeu, përzgjedhja e së cilës është bërë nëpërmjet një konkursi publik në qytetin e Lezhës dhe në media. Bashkëlidhur po ju dërgojmë planvendosjen dhe projektin teknik të realizimit të tij. Pozicionimi i saj është hartuar në mënyrë që mos të cënohet monumenti i kulturës “Kisha e Shën Nikollit” dhe as mos të bllokohet pamja e saj nga hyrja e sheshit. Struktura e themelit e përdorur është bazament sipërfaqësor, pa patur nevojën e gërmimeve.
Kështu që nëntoka e Zonës A, të Parkut Arkeologjik Lezhë nuk dëmtohet, sepse e gjithë struktura do ndërtohet sipër brezit të betonit dhe kalldrëmit ekzistues të sheshit “Gjergj Kastrioti”.
Kërkojmë nga ana juaj aprovimin e projektit teknin dhe vendosjes së shtatores me qëllim që të vazhdohet me punimet për realizimin në kohë të tij.
Duke ju falënderuar për bashkëpunimin!
