Kreu i Partisë Demokratike, Lulzim Basha ka votuar në selinë blu për zgjehdjet që po mbahen brenda PD-së. Gjatë fjalës së tij ai ka falenderuar mediat për mbulimin që I kanë bërë procesit dhe demokratët në të gjithë Shqipërinë, që janë kujdestarë të procesit. Basha tha se këto janë vlerat e demokracisë e të shprehjes së lirë dhe debatit në PD dhe se me këto vlera ka nisur beteja për Shqipërinë, për të rrëzuar regjimin Rama-Doshi.
“Dua të falënderoj mediat për mbulimin që po i bëjnë këtij procesi unik. Dua të falënderoj të gjithë demokratët anembanë të Shqipërisë dhe të gjithë ata që janë kujdestarë të procesit. Në këtë proces unik, të vlerave tona të procesit të zgjedhjes me një anëtar një votë të kryetarit të PD-së.
Këto janë vlerat tona të demokracisë të shprehjes së lirë dhe të debatit. Me këto vlera e kemi nisur betejën për Shqipërinë dhe shqiptarët dhe me këto vlera do ta çojmë deri në fund betejën për rrëzimin e regjimit Rama –Doshi”, tha Basha.
Zgjedhjet në PD kanë nisur në orën 08:00 të mëngjesit të sotëm dhe pritet të mbyllen në orën 19:00. Në garë janë kreu aktual Lulzim Basha, Fatbardh Kadilli, Edit Harxhi dhe Agron Shehaj.
