Ish-deputeti i PD-së, Ervin Salianji, ka reaguar pas deklaratave të bëra nga ana e Agron Shehajt, i cili tha se është sulmuar pas takimit me ambasadoren amerikane Yuri Kim. Salianji tha se në Partinë Demokratike kurrë s’ka pasur e nuk do ketë antiamerikanë.
Postimi i Ervin Salianjit:
“Keqardhje për akuzat e rëndomta e mbi të gjitha të pavërteta të kandidatit Agron Shehaj. Një gjë është e sigurt, që në Partinë Demokratike, nuk ka pasur nuk ka dhe nuk do të ketë asnjëherë vend për asnjë antiamerikan.
Në vendin më pro-amerikan në botë dhe në partinë më proamerikane, të kërkosh për antiamerikanë dhe të aludosh se ata janë pjesë e partisë ku bën pjesë është ofendim i ulët dhe një dëm që tentojnë t’i bëjnë PD. Një gjë të tillë deri më sot me shpifjen që e karakterizon ka guxuar ta thotë vetëm Edi Rama”, shkroi Salianji.
Por cila ishte deklarata e Agron Shehajt? “Përveç reagimeve të demokratëve për shpalljen “non grata” të Berishës nga SHBA, ka patur edhe sulme nga individë që kanë filluar të punojnë kohët e fundit në PD dhe kanë qasje anti-amerikane. Janë të kontraktuar. Sulmet që më janë bërë pasi u bë i ditur takimi me ambasadoren amerikane janë të orkestruara”, tha Shehaj, kandidat për kreun e PD-së.
