Kryeministri i Shqipërisë, Edi Rama, me anë të një postimi në faqen e tij zyrtare në “Facebook”, ka shkruar se plot 349 aplikantë ekselentë janë gati t’i bashkohen nismës “Gati për Shqipërinë”. Rama i falënderoi të gjithë aplikantët, si dhe tha se nesër do të nisë menjëherë puna, me anë të aplikacionit “Zoom”. Pjesë e kësaj bisede online, do të jetë dhe vetë kryeministri Rama, por fokusi më i madh do të jetë mes grupit të punës që është ngritur për këtë nismë, dhe studentëve ekselentë.
Mesazhi i Ramës:
349 SHPREHJE INTERESI deri mbrëmë janë një shifër e papritur në një kohë relativisht kaq të shkurtër. Ato ndahen në tre kategori kryesore:
• Kontributorë të gatshëm nga jashtë vendit, në mbështetje të reformave e të programeve të Mandatit të Tretë sipas fushave
• Kontributorë të gatshëm të kthehen nga jashtë, për t’u angazhuar krah qeverisë në Mandatin e Tretë
• Kontributorë të gatshëm brenda vendit, që duan të na bashkohen në përpjekjet e Mandatit të Tretë
Me një FALEMINDERIT të madh, i lajmërojmë të gjithë të interesuarit se duke nisur nga nesër, do të marrin njoftimin për ditën dhe orën e komunikimit të drejtëpërdrejtë në distancë – online zoom – me Kryeministrin e me grupin e punës për këtë nismë.
Me konsideratat më të larta,
Zyra e Koordinimit të nismës “Gati për Shqipërinë”.
