Janë publikuar pamjet nga atentati ku mbeti i vrarë Bledar Birçaj pasditen e sotme në Vlorë. Në videon e publikuar nga emisioni “Opinion” shihet se makina ka qenë duke kaluar në zonën e Lungomares dhe aty i kanë prerë rrugën. Dy autorët, veshur me të zeza, kanë dalë nga maikan e tyre dhe kanë qëlluar me breshëri ndaj viktimës.
Autorët, duke përfituar edhe nga fakti që viktima ishte duke ecur ngadalë, i janë afruar e më pas kanë nisur të qëllojnë me armë. Pasi sigurohen që kanë qëlluar mjaftueshëm plumba, autorët largohen me shpejtësi në makinën e tyre. Në këtë moment, njërit prej tyre i bie arma dhe kthehet ta marrë.
Kur autorët janë tërhequr, personi që është ende i paidentifikuar dhe shoqëronte 40-vjeçarin Birçaj, ka dalë qetësisht nga mjeti. Në vetëm një moment ai ka kthyer kokën pas e më tej ka vazhduar rrugën.
Pamjet në Opinion u publikuan nga gazetari Artan Hoxha.
Bledar Birçaj u ekzekutua sot në Vlorë, në lagjen “Hajro Çakërri”. Ai u transportua në spitalin e Vlorës, por nuk arriti t’u mbijetonte plagëve të marra. Policia është ende në kërkim të autorëve të ngjarjes teksa kontrollet në zonë kanë vazhduar që pas ekzekutimit të 40-vjeçarit.
