Kryeministri Edi Rama ka thënë se vendet e rajonit duhet të punojnë së bashku për të arritur hapësirën Shengen ku zbatohen 4 liritë e Europës. Sipas tij kjo do të ndihmojë që atfomsfera të bëhet dashamirëse kur vjen puna te temat e nxehta.
“Mendoj që pikësëpari mënyra më e mirë për të ecur përpara të biem dakord për mos rënë dakord për atë që nuk është e zgjidhshme. Të punojmë së bashku me gjithë vendet e rajonit për atë që është e mundur. Duhet të bëjmë më të mirën për të arritur këtë hapësirën Shengen, ku 4 liritë e Europës zbatohen. Kjo po kështu do të ndihmojë që ta bëjë atmosferën dashamirëse, kur bëhet fjalë për temat e nxehta”, tha Rama.
Kryeministri foli gjithashtu edhe për dialogun Kosovë-Serbi duke thënë se ai nuk mund të realizohet pa përfshirjen e Francës dhe Gjermanisë dhe ai tha se të dyja palët nuk mund ta bëjnë këtë më vete.
“Besoj fort, është thelbësore ajo çka Gjermania dhe Franca do të duan të bëjnë kur bëhet fjalë për dialogun Serbi-Kosove. Është tejzgjatur për një kohë të gjatë, dhe është parë sipas meje në mënyrë jo korrekte, kjo ka qenë ndjesia në të dyja vendet si diçka që është lënë në nivel më të ulët se sa të vihet në krye. Pra sjellja në nivelin më të lartë, përfshirja e Francës dhe Gjermanisë, apo dhe të tjerët, është e rëndësishme. Nuk shoh se si dy palët të mund ta bëjnë këtë më vete, por e di që s’është e mundur”, ka thënë Rama.
