Ish-presidenti Bujar Nishani ka këshilluar që Partia Demokratike të vazhdojë me rrugën e bojkotit pas humbjes në 25 prill. Në një intervistë në emisionin Përballë të gazetarit Lutfi Dervishi, Nishani tha se është e pakuptimtë të mos njohësh zgjedhjet dhe të hysh në parlament. Ai tha se nëse nuk nijihen zgjedhjet atëherë duhet të refuzohet edhe marrja e mandateve. Nëse PD shkon në parlament atëherë e ka njohur humbjen dhe e ka pranuar rezultatin, pra ka pasur manipulime por jo që të ndikojnë në proces.
“PD të vijojë rrugën e bojkotit. Nuk i njohim zgjedhjet, por hyjmë në parlament. Kjo është një tezë e pakuptimtë sepse nëse ti nuk i njeh zgjedhjet, atëherë bën atë që bëre pak vite më parë, refuzon marrjen e mandateve. Humbja është e njohur se po thuhet do shkojmë në parlament. Kjo do te thotë që e ke pranuar rezultatin. Që do të thotë ka pasur manipulime, por jo që të ndryshojnë këtë rezultat .Janë mekanizma që nuk funksionojnë. Ndërtimi i mekanizmave të tillë paralel nuk mund të jenë funksional për opozitën. Opozita nuk ka polici dhe nuk komandon policinë, nuk ka prokurori dhe nuk komandon prokurorinë. Mund ti ndërtosh formalisht, por të kthehen në bumerang”, ka thënë Nishani.
