Komisioni Qendror i Zgjedhjeve ka certifikuar fitoren e Partisë Socialiste në zgjedhjet parlamentare të 25 prillit. Komisioneri Shtetëror i Zgjedhjeve miratoi në mbledhjen e sotme tabelat e rezultateve për 11 qarqe, pasi më 1 maj ishte vendosur për qarkun e Kukësit. Asnjë nga partitë e përfaqësuara në KQZ nuk pati pretendime për certifikimin e rezultatit.
Ndërkohë, nga dita e sotme çdo parti ka 5 ditë kohë afat për të bërë ankim në Komisionin e Ankesave dhe Sanksioneve (KAS) nëse duan rinumëri votash apo kanë pretendime për rezultatin.
Në rast se ka ankesa, ato shqyrtohen dhe Kolegji jep më pas vendimet. Në rast se nuk ka asnjë subject që nuk e çon në Kolegj, Ilirjan Celibashi shpërndanë më pas mandatet me emrat e deputetëve.
Në zgjedhjet e 25 prillit ishte Partia Socialiste ajo që u shpall fituese duke arritur të sigurojë 74 mandate për të qeverisur sërish vendin pas 8 vitesh në pushtet. Partia Demokratike arriti të siguronte vetëm 59 mandate, ndërsa Lëvizja Socialiste për Integrim vetëm tre. Po ashtu arriti të siguronte 3 mandate edhe Partia Socialdemokrate e Tom Doshit.
Ndërkohë, nuk dihet ende nëse Partia Demokratike do ta njohë rezultatin e zgjedhjeve. Nga deklaratat e kandidatëve demokratë, mes tyre Grida Duma, Mark Marku, Ervin Salianji etj. është lënë të kuptohet se ende nuk është marrë një vendim për këtë çështje.
