Presidenti i vendit, Ilir Meta, ka ripërsëritur edhe një herë ditën e sotme rinumërimin e votave të pavlefshme. Meta ka nxjerr sot shifrat e votave të pavlefshme në vitin 2013 dhe në vitin 2017 duke i krahasuar me votat e pavlefshme që kanë dal nga zgjedhjet aktuale.
Duke u bazuar në këto rezultate, Kreu i Shtetit thekson se numërimi dhe rinumërimi i çdo vote të pavlefshme është vendimtar, për të rritur besimin e qytetarëve.
Ai thotë se krijimi i fokuseve të tjera, përtej kësaj çështjeje madhore për besimin te zgjedhjet dhe demokracia, është vetëm vijim i teatrit të radhës kundër Sovranit dhe vullnetit të tij.
Deklarata e plotë e Presidentit të Republikës, Ilir Meta
Në zgjedhjet e vitit 2013 vetëm 1.39 për qind e votave ishin të pavlefshme.
Në vitin 2017 vetëm 1.98 për qind votave u shpallën të pavlefshme.
Aktualisht, sipas rezultateve paraprake të KQZ, kemi 5 për qind fletë votimi të pavlefshme.
Ndaj numërimi dhe rinumërimi i çdo vote të pavlefshme është vendimtar për të rritur besimin e qytetarëve, të cilët mbajtën radhë të gjata për të shprehur vullnetin e tyre më 25 prill.
Me qetësi dhe transparencë është tepër e rëndësishme, që ky proces, të vazhdojë deri në fund.
Krijimi i fokuseve të tjera, përtej kësaj çështjeje madhore për besimin te zgjedhjet dhe demokracia, është vetëm vijim i teatrit të radhës kundër Sovranit dhe vullnetit të Tij.
Deri tani janë rreth 50 mijë vota të pavlefshme më shumë se në vitin 2017 dhe rreth 60 mijë vota të pavlefshme më shumë se në vitin 2013, ndërkohë që 8 vite më parë votuan rreth 80 mijë qytetarë më shumë se sa në zgjedhjet e 25 prillit.
Në demokraci qytetarët marrin pjesë në zgjedhje për t’i dhënë vlerë vullnetit të tyre dhe jo për ta bërë atë të pavlerë.
Të rikthejmë besimin te vlera dhe barazia e votës sa më parë, me transparencë maksimale sipas Kodit Zgjedhor.
📌 Bashkëngjitur statistikat krahasuese të vitit 2013, vitit 2017 dhe 25 prillit 2021
