Zëvendës kryetari i LSI, Luan Rama ka një mesazh të veçantë që e ka dhënë nëpërmjet poezisë. Në një status në Facebook, Rama shkruan se poezia është shpikja e parë që dalloi njeriun nga kafsha.
Kujtojmë që Luan Rama ishte i pari në listën e kandidatëve të LSI-së në Vlorë, por nuk arriti të siguronte mandatin e deputetit. Ai nuk gjeti mbështetje edhe nga Petrit Vasili, i cili nga Vlora bëri thirrje që të votohej numri 2 i listës.
Statusi i plotë i Luan Ramës:
Poezia është shpikja e parë pas shpikjes së gjuhës që e dalloi njeriun nga kafsha, ka shkuar një studiues serioz i saj.
Pasioni im për poezinë është ndërkaq po aq jetësor sa vetë gjuha, ndaj më pëlqen që hëra-herës t’ju ftoj edhe ju të shijoni (sepse poezia shijohet, nuk lexohet) poezitë që unë i zgjedh ndër poetët tanë më të shquar.
Sot po ju ofroj një poezi prej mikut tim, poetit Hamit Aliaj, arti i të cilit e bën atë ndër bartësit e përgjegjësisë bashkë me Ilirian Zhupën, Rudolf Markun, Preç Zogajn e ndonjë tjetër, për të na dëshmuar se poezia e shkruar në shqip, ka poetë që ia mbrojnë nderin dhe që e nderojnë me shumë dinjitet edhe sot, jo vetëm si pasardhës të Dritëroit, Kadaresë, Arapit, Dhori Qiriazit, Xhavahir Spahiut etj, por më shumë si vazhdues e pasurues të një mozaiku vlerash të qenësishme për kulturën tonë kombëtare.
FAJE DRUNI
Nga Hamit Aliaj
Ai nuk shkoi asnjë ditë në luftë.
Kur ajo mbaroi dhe flitej për të munguarit,
I shpalli tradhtare të gjitha pemët:
Pse ju çelët lule
Edhe në kohë të robërisë?!
Me sakicë në krah, një nga një i pret.
Me drunin e tyne gdhend
Të dekun prej druni,
Që del e i shet
Në emën të historisë…
