Beteja politike në Shqipëri, duket më e ashpër se kurrë gjatë ditëve të fundit. Kur na ndajnë vetëm 28 ditë nga zgjedhjet e 25 prillit, kreu i Partisë Demokratike, Lulzim Basha, ka ndarë në rrjetet sociale gjërat që i konsideron dështime të Edi Ramës.
“A ka dështuar reforma energjetike e Ramës?”, pyet Basha, duke u përgjigjur “Po”. Ai e argumenton përgjigjen duke shpërndarë një artikull të BIRN me titull: “Katër vjet pas reformës energjitike, OSHEE mbyll vitin me 64 milionë euro humbje”.
Më pas, kryedemokrati ndalet te Kuvendi, duke shtruar pyetjen: “Rama premtoi fuqizimin e parlamentarizmit dhe përmirësimin e hartimit të legjislacionit. A e ka mbajtur këtë premtim?” Sërish përgjigja e tij është: “Jo”. Kreu i PD ka shpërndarë një artikull të BIRN me titull: “Parlementi kryen ndryshime ligjore me urgjencë dhe pa konsultim”.
Duket se lufta më e fortë politikë në vend po bëhet pikërisht në rrjetet sociale. Zgjedhjet e 25 prillit do të vendosin shumë për dy partitë më të mëdha në vend. Nëse Edi Rama dhe PS shpallen fitues, atëherë do të shkruanin historinë, duke u bërë partia e parë që merr tre mandate qeveritare radhazi, ndërsa në rast se fiton PD, do të rrëzonte qeverinë Rama pas plot 8 vitesh në pushtet.
