Vazhdojnë kërkimet për gjetjen e 33-vjeçarit Arjan Sala prej të cilit nuk ka asnjë shenjë prej më shumë se 50 orësh që kur u fut në magazinën në flakë të “Casa Italia” për t’u ardhur në ndihmë kolegëve.
Zjarrfikësit kanë vijuar kërkimet me duar dhe me këmbë por pa rezultat, ndërsa i kanë kërkuar edhe njërit prej familjarëve të bashkohet me ta për të bërë të mundur gjetjen e të riut me anë të ndonjë detaji identifikues.
Mësohet se pas disa kërkimeve pa rezultat, zjarrfikësit kanë dalë jashtë, ndërsa familjari i Arjan Salës ka vazhduar të qëndrojë brenda duke thënë se nuk del prej atje pa e gjetur dhe prej mëse një ore vijon të jetë në magazinë.
Flakët në magazinën e “Casa Italia” u vunë në kontroll vetëm ditën e sotme, ndërsa që prej të mërkures kur ngjarja ndodhi nuk ka ende asnjë shenjë nga Arjan Sala i cili u fut heroikisht në magazinë e mbeti i bllokuar mes flakëve.
Familjarët vazhdojnë të presin të dëshpëruar jashtë ndërtesës, ndërsa herë pas here kanë pasur debate edhe me zjarrfikësit pasi kanë kërkuar të futen vetë brenda për ta kërkuar. Po ashtu ata kanë thënë se zjarrfikësit nuk kanë pasur mjetet e nevojshme për kërkimin dhe se janë vonuar për të mbërritur në vendngjarje.
