Prej dy ditësh vendi është përfshirë nga reshjet e dëborës dhe ngrica. Kryesisht në pjesën veriore të vendit rrugët kalohen vetëm me zinxhirë.
Në qarkun e Elbasanit situata paraqitet problematike nga reshjet e dëborës. Situata paraqitet më e rëndë në Qafë Thanë ku trashësia e dëborës ka kaluar 50 cm.
Aktualisht aksi nacional është i kalueshëm pa përdorimin e zinxhirëve, por shtabet e emergjencave këshillojnë drejtuesit e mjeteve të tregohen të kujdesshëm, pasi ulja e temperaturave gjatë natës mund të sjellë ngrica dhe për pasojë probleme në qarkullimin e mjeteve.
Në Bulqizë Reshjet e dëborës, trashësia e cila shkon nga 30 deri në 80 centimetra në zona të thella malore dhe ulja e temperaturave deri në -5 grade, kanë shkaktuar mjaft probleme për banorët.
Ndërkohë si pasojë e reshjeve shumë linja të tensionit të lartë dhe atë të ulët kanë lënë pa energji njësitë administrative dhe një pjesë të qytetit.
Për shumë fermerë të cilët kishin nisur plugimin e tokave dhe mbjelljen e farave të ndryshme reshjet kanë prishur gjithçka por jo vetëm, dëmtime ka pasur edhe në frutikulturë.
Edhe qarku i Lezhës është përfshirë nga reshje bore ku më me intensitet të lartë kanë qenë në zonën e Mirditës.
Në rrugën e Kombit, kanë qenë me dhjetëra borëpastruese të cilat për të moslejuar bllokimin e rrugës së Kombit kanë qene gjatë gjithë kohës në terren duke larguar borën nga rruga por dhe duke hedhur kripë për të lejuar qarkullimin e mjeteve lirisht.
