Një aksident i rëndë ka ndodhur mbrëmjen e sotme në orën 20:35, në autostradën Tiranë-Durrës.
Një automjet ka përplasur një këmbësor 50-vjeçar, i cili ka humbur jetën pas plagëve të rënda duke gjetur vdekjen në vendngjarje.
Sipas informacioneve paraprake, dyshohet e viktima ka qenë endacak dhe nuk ka pasur dokumente identifikimi me vete.
Ndërkohë, drejtuesja e mjetit, shtetsja me iniciale K.G., 21-vjeç, është shoqëruar në polici për sqarimin e rrethanave .
Policia ndodhet në vendin e ngjarjes dhe vijon hetimet për zbardhjen e plotë të aksidentit, ndërsa qarkullimi i mjeteve ka devijuar në rrugën dytësore.
Kujtojmë se aksidentet e shumta rrugore kanë bërë që masat ndaj shoferëve të shtohen dhe në janar policia paralajmëroi se shumë shpejt, përveç dregerit të alkoolit, do përdorë edhe dragerin për të parë nëse drejtuesit kanë konsumuar lëndë narkotike.
Po ashtu, ministri i Brendshëm, Sandër Lleshaj deklaroi se për herë të parë në Shqipëri shoferët do t’i nënshtrohen të ashtuquajturit ‘testi i idiotit’, për të parë gjendjen e tyre psikologjike kur efektivët shohin sjellje të dyshimta.
Ndryshime pritet të bëhen në Kodin Rrugor, ku parashikohet që drejtuesit e rinj të automjeteve të kenë më shumë penalizim se të tjerët dhe kjo masë parashikon që shoferët të cilët kanë më pak se 3 vite që kanë marrë patentën do të ndëshkohen 50 % më shumë për disa nga shkeljet e qarkullimit rrugor, si: parakalimet e gabuara, për përdorimin e alkoolit, mosdhënien e përparësisë, e disa shkelje të tjera.
Masa do merren gjithashtu edhe për këmbësorët, pasi parashikohet një rritje e gjobës për ta, e cila do fillojë nga 1 mijë deri në 4 mijë lekë.
Ndryshime në Kodin Rrugor, ashpërsohen masat për shoferët e rinj dhe këmbësorët
