Destinacioni final i ngarkesës prej 137 kokainë, e cila u seskuestrua në portin e Durrësit, ishte Fieri dhe Elbasani.
“Shqiptarja.com”, ka mësuar se dy banda të fuqishme në këto qytete, kishin porositur sasinë e kokainës.
Lënda narkotike ishte futur në kontenierët frigoriferikë me banane, të kompanisë “Alba Exotic Fruit”, në pronësi të Eduart Dautit.
Sasia e drogës ishte nisur nga Ekuadori dhe kishte ndaluar në portin e Pireut në Greqi më parë.
Aty policia greke, në bashkëpunim me DEA-n amerikane, ndërruan kokainën me thaës me oriz dhe i vendosën brenda GPS.
Në Durrës lënda narkotike u tërhoq nga Ardian Bega, punonjës i sigurisë në port, si dhe Altin Myslihaka, i cili ishte pastrues në anijen e peshkimit të biznesmenit, Gentian Malindi.
Ky i fundit priste Begën dhe Myslihakën në një makinë me targa franceze, ku pasi ngarkuan kokainën, u nisën drejt Shkëmbit të Kavajës.
Këtu mendohet se është dekonsipruar aksioni i policisë, si pasojë e një telefonate që ka informuar Malindin.
Ky i fundit është në kërkim dhe është dënuar me burg në mungesë, ndërsa dy të tjerët janë arrestuar ditën e djeshme.
Përsa i përket “kokave” të trafikut në Elbasan dhe Fier, dyshohet se janë dy persona me iniciale A.C dhe L.M, për të cilët policia nuk ka dhënë shumë informacion.
Gentian Malindi është një personazh i njohur për drejtësinë shqiptare.
Ai është kapur në të shkuarën me 289 kg materiale bimor kanabis, të cilin e kishte vendosur brenda një furgoni.
Bashkë me të në furgon ndodhej edhe Ervis Bardhi, i cili është i dyshuari kryesor për vrasjen e Gentian dhe Nezir Beqirit në gusht të 2012-ës.
Në lidhje me kanabisin, Malindi ia hodhi drejtësisë, duke thënë se donte të provonte furgonin dhe nuk e dinte se çkishte brenda.
Përgjegjësinë e mori Bardhi, i cili pranoi se kishte kryer rolin e korrierit dhe u dënua me 8 vite burg.
Në dëshminë e dhënë në Gjykatës e Kavajës, Bardhi ka treguar se në 2013-ën e ka telefonuar Olsi Leka, duke i thënë se të nesërmen do takoheshin me shokun e tij në Tiranë, që quhej Ardian.
Ky i fundit i premtoi 500 euro Bardhit për të lëvizur furgonin, i cili i kishte mbetur në Kavajë dhe nuk kishte shofer.
Më parë ai i kishte sqaruar Bardhit se çfarë kishte brenda në furgon.
Më tej Ardiani i ka dhënë Bardhit edhe një celular ku kishte të regjistruar një numër me emrin “Ari”, nga i cili do merrte koordinatat për denstinacionin e drogës.
Ndërkohë për sa i përket dy organizatorëve, Ardianit dhe Olsi Lekës, policia nuk ka mundur të bjerë në gjurmët e tyre sot e kësaj dite.
