Departamenti i Shtetit ka ndaluar hyrjen në Shtetet e Bashkuara të Amerikës të kryetarit të Bashkisë së Durrësit, Vangjush Dakos.
Po ashtu mësohet se hyrja u është ndaluar edhe anëtarëve të familjes së tij. Ky vendim u mor nga Sekretari i Shtetit, pasi ka theksuar se kryetari i Bashkisë, Dako është i përfshirë në raste të mëdha korrupsioni.
Sipas “Zërit të Amerikës”, kur Sekretari i Shtetit, ka informacione të besueshme se një zyrtar i huaj është përfshirë në raste madhore korrupsioni, ose shkelje të të drejtave të njeriut, atij dhe familjes së tij të ngushtë i ndalohet hyrja në Amerikë.
Ligji amerikan po ashtu i jep të drejtë Sekretarit të Shtetit që vendimin e tij ta bëjë publik. Sipas njoftimit të sotëm, Vangjush Dako, bashkëshortja e tij Alba Dako, djali Xhulio Dako dhe vajza e tij Kejsi Dako nuk lejohen të hyjnë në Amerikë.
Dako, bëhet kështu zyrtari i tretë nga Shqipëria së bashku me Adriatik Llallën dhe Tom Doshin që ndalohen të hyjnë në Shtetet e Bashkuara.
Ky është një sinjal i fortë se Shtetet e Bashkuara të Amerikës, po angazhohen gjithmonë e më shumë për të luftuar korrupsionin në vende të tjera të botës.
