Një qytetare ka depozituar padinë e parë ligjore në lidhje me ndotjen e rëndë të ajrit të shkaktuar nga zjarri që përfshiu për disa ditë landfillin e Elbasanit, duke djegur mbetje urbane në shkallë të gjerë.
E shoqëruar nga avokati i organizatës “Drejtësia Sociale”, Gentian Sejrani, ajo kërkon dëmshpërblim për përkeqësimin e gjendjes së saj shëndetësore si pasojë e ndotjes.
Sipas një njoftimi të publikuar nga “Drejtësia Sociale” në rrjetin “Facebook”, qytetarët e Elbasanit kanë përjetuar simptoma shqetësuese gjatë ditëve të zjarrit, si vështirësi në frymëmarrje, djegie të syve, dhimbje koke dhe ndjesi të përziera.
Prej vitesh, Elbasani përballet me ndotje sistematike dhe mungesë transparence në menaxhimin e mbetjeve, duke e bërë këtë veprim një precedent të rëndësishëm për komunitetin dhe llogaridhënien institucionale.
Postimi i plotë:
Një javë pas protestës së zhvilluar në qytetin e Elbasanit kundër ndotjes që vjen nga zjarret e pamenaxhuara të mbetjeve, një qytetare nga Elbasani, e diagnostikuar me astmë bronkiale në formë të rëndë, ka depozituar një padi civile kundër kompanisë “ECO–ELB” sh.a dhe Bashkisë Elbasan, për dëmet e shkaktuara nga ndotja ajrore e shkaktuar pas zjarrit të madh në landfillin e mbetjeve më 1 korrik 2025. E shoqëruar nga aktivisti dhe avokati i Drejtësi Sociale, Gentian Sejrani, qytetarja kërkon dëmshpërblim për përkeqësimin e gjendjes së saj shëndetësore, si pasojë direkte e kësaj ngjarjeje.
Zjarri, i cili përfshiu hapësira të mëdha të landfillit pranë inceneratorit, çliroi re të dendura tymi të zi, me erë të rëndë djegieje plastike dhe materiale organike, që për ditë të tëra u përhapën në zonat e banuara. Gjatë javës së parë të muajit korrik, qytetarët e Elbasanit, përfshirë edhe paditësen, përjetuan simptoma shqetësuese si vështirësi në frymëmarrje, djegie në sy, dhimbje koke dhe ndjesi të përziera.
Kjo nuk është hera e parë që një ngjarje kaq e rëndë ndodh. Ngjarje të ngjashme janë regjistruar në të njëjtin vend edhe në vitet 2022 dhe 2023, duke treguar se kompania “ECO–ELB” sh.a ka dështuar të marrë masa parandaluese, pavarësisht precedentëve. Nga ana tjetër, Bashkia Elbasan nuk ka vepruar sipas përgjegjësive që i ngarkon ligji për mbrojtjen e jetës dhe mjedisit të qytetarëve.
Sipas matjeve të realizuara nga organizata COPLAN më 2 korrik, cilësia e ajrit ka qenë shumëfish mbi normat e lejuara të BE-së, duke përfshirë nivele alarmante të NO₂, CO₂, metanit, komponimeve organike të paqëndrueshme (VOCs) dhe grimcave PM2.5/PM10 – me pasoja të rënda për shëndetin, veçanërisht për personat me sëmundje kronike respiratore. Kjo padi është një hap i rëndësishëm drejt kërkimit të drejtësisë mjedisore dhe llogaridhënies institucionale, në një qytet që prej vitesh përballet me ndotje sistematike dhe mungesë transparence mbi menaxhimin e mbetjeve urbane. Ne qëndrojmë pranë të gjithë qytetarëve që kërkojnë të mbrojnë shëndetin e tyre dhe të jetojnë në një mjedis të pastër dhe të sigurt!
