Ditët e fundit vendi ynë është përfshirë nga zjarre të cilat kanë djegur hapësira të tëra pyjore, favorizuar edhe nga temperaturat e larta. Ministri i Mbrojtjes, Niko Peleshi ka reaguar për herë të parë lidhur me zjarret që kanë përfshirë vendin ditët e fundit. Peleshi ka shkruar se aktualisht në vendin tonë janë aktive tetë vatra zjarri. Ai ka treguar më tej se të gjitha strukturat shtetërorë të emergjencave civile po punojnë intensivisht për neutralizimin e flakëve. Peleshi thotë se situata më kritike paraqitet në Karaburun, Shijak, Përmet dhe Fier.
Gjithashtu ai iu ka bërë thirrje qytetarëve që të kenë kujdes në zonat ku për shaka të thatësirës dhe temperaturave të larta paraqitet rrezik për zjarr.
Statusi nga Niko Peleshi
Aktualisht në vend kemi 8 vatra zjarri aktive, të gjitha strukturat shtetërore të emergjencave civile në zonat përkatëse, po punojnë intensivisht për neutralizimin e tyre. Në zonat ku situata paraqitet më kritike, janë angazhuar mjetet dhe trupat e Forcave të Armatosura, të tilla janë rastet e Karaburunit, Shijakut, Përmetit, Fierit etj. Pjesa tjetër e Forcave të Armatosura është në gatishmëri të plotë për situata të mundshme në orët/ditët në vazhdim.
Nga ana tjetër i bej thirrje komunitetit të jetë i kujdesshëm në zonat ku për shkak të thatësirës paraqitet rrezik i lartë zjarri, gjithashtu i ftoj ata të bashkëpunojnë me strukturat shtetërorë për njoftimin në kohë të situatave apo denoncimin/evidentimin e keqbërësve të qëllimshëm.
