Një zjarr masiv ka përfshirë pasditen e sotme Parkun Kombëtar të Prespës, në zonën mbi fshatin Pustec, duke shkaktuar alarm në gjithë qarkun e Korçës.
Flakët janë përhapur me shpejtësi në brendësi të pyllit, të favorizuara nga temperaturat e larta dhe era e fortë, duke e bërë situatën jashtëzakonisht të vështirë për kontroll.
Në vendngjarje janë angazhuar mbi 50 forca ndërhyrjeje, përfshirë zjarrfikësit e bashkisë Pustec, punonjës të ADZM-së, policinë kufitare dhe forcat e shërbimeve publike.
Pavarësisht përpjekjeve intensive, flakët vijojnë të avancojnë dhe rrezikojnë zona më të thella të parkut.
Zjarri përbën një nga vatrat më problematike të regjistruara ditët e fundit në juglindje të vendit. Banorët e zonës janë përfshirë gjithashtu në përpjekjet për izolimin e flakëve, ndërsa autoritetet apelojnë për kujdes dhe bashkëpunim në këtë situatë kritike që rrezikon një nga zonat më të rëndësishme natyrore të Shqipërisë.
