Zheja sjell në jetë një dasmë 100-vjeçare: Traditat shqiptare ngjallin emocion dhe krenari

Në fshatin e vogël të Zhejes, në Kurbin, koha u kthye pas. Në një festë të mbushur me ngjyra, muzikë dhe emocion, banorët sollën në skenë një dasmë shqiptare ashtu siç festohej një shekull më parë.

Veshjet tradicionale, tingujt e çiftelisë, daullet dhe vallet popullore krijuan një atmosferë autentike, ku çdo detaj u organizua me përkushtim nga fëmijët tek më të moshuarit.

Festimet nisën në oborrin e shkollës, ku u zhvillua “Dasma e Zhejes”, një aktivitet që mblodhi qindra pjesëmarrës dhe i dha fshatit një ngjarje të paharrueshme.

Të emocionuar, banorët theksuan rëndësinë e kësaj iniciative, jo vetëm si argëtim, por edhe si një mënyrë për të ruajtur dhe transmetuar trashëgiminë kulturore.

“Po u tregojmë fëmijëve tanë rrënjët tona, kush jemi dhe nga vijmë,” u shprehën disa prej pjesëmarrësve.

Kjo dasmë simbolike ishte më shumë se një rikreacion i së kaluarës, ajo u kthye në një thirrje për ruajtjen e identitetit kombëtar.

Traditat, zakonet dhe historia u sollën si një amanet që duhet trashëguar brez pas brezi, si gurë themeli të një kulture që nuk duhet të harrohet.