Jemi vetëm 4 ditë larg datës së zgjedhjeve të 30 qershorit. Pak minuta më parë Partia Demokratike ka prezantuar strategjinë e saj për zgjedhjet, por edhe pas tyre.
Partia Demokratike ka bërë me dije se protestat do të shtrihen në të 61 bashkitë e vendit “në mbrojtje të demokracisë dhe rendit kushtetues dhe kundër farsës së votimeve të paligjshme”.
Mësohet se ky vendim është marrë për të mbrojtur demokracinë dhe rendin kushtetues. Protesta do të zhvillohet në sheshet qendrore të qyteteve dhe pranë qendrave të KZAZ-ve.
Ndërkohë nga ana tjetër kryeministri Rama vazhdon të shprehet i bindur se në 30 qershor do të ketë zgjedhje.
Ditën e sotme gjithashtu Këshilli i Europës ka vendosur të anulojë misionin e tij vëzhgues për zgjedhjet e 30 qershorit “për shkak të pasigurisë lidhur me organizimin e tyre dhe rrezikut të mundshëm të vendosjes në zona të ndryshme”.
Përmes një e-maili dërguar zyrës së Këshillit të Europës në Tiranë, ata konfirmojnë mos praninë e tyre në Shqipëri për zgjedhjet vendore.
