Presidenti i Republikës, Ilir Meta është shprehur se zgjedhjet lokale në Kosovë janë shembull për të gjitha vendet e Ballkanit Perëndimor, për mënyrën e nxjerrjes dhe pranimit të rezultateve nga palët.
Presidenti Meta zhvilloi sot një takim me me zv/Kryeministren dhe Ministren e Punëve të Jashtme Kosovës, Donika Gërvalla.
Nëpërmjet një postimi në rrjetet sociale Meta theksoi se “Zhvillimi i zgjedhjeve lokale, nxjerrja si dhe pranimi i rezultateve paraprake nga të gjitha palët në proces është një shembull për të gjithë rajonin se si duhet të zhvillohen dhe administrohen zgjedhjet.
Ndër të tjera Kreu i Shtetit shton se gjatë takimit me Ministren e Punëve të Jashtme Kosovës, ka theksuar nevojën e bashkëpunimit mes dy vendeve.
“Theksova nevojën që Shqipëria dhe Kosova të bashkëpunojnë edhe më ngushtësisht në lehtësimin e çdo pengese, që ekziston në zhvillimet në fushën politike, kulturore, ekonomike, tregtare dhe të gjitha sferat e tjera të jetës”- shkruan Meta.
Postimi i plotë i Presidentit Meta
Kënaqësi të mirëprisja sot në takim Zëvendëskryeministren dhe Ministren e Punëve të Jashtme dhe të Diasporës së Republikës së Kosovës, Znj.Donika Gërvalla.
Përgëzova institucionet e Republikës së Kosovës për zhvillimin me korrektësi dhe në mënyrë demokratike të zgjedhjeve lokale, që u mbajtjen dje.
Zhvillimi i zgjedhjeve lokale, nxjerrja si dhe pranimi i rezultateve paraprake nga të gjitha palët në proces është një shembull për të gjithë rajonin se si duhet të zhvillohen dhe administrohen zgjedhjet.
Theksova nevojën që Shqipëria dhe Kosova të bashkëpunojnë edhe më ngushtësisht në lehtësimin e çdo pengese, që ekziston në zhvillimet në fushën politike, kulturore, ekonomike, tregtare dhe të gjitha sferat e tjera të jetës.
Të dyja vendet tona, së bashku duhet të punojnë për forcimin dhe konsolidimin e subjektivitetit ndërkombëtar të Kosovës, si dhe për përshpejtimin e proceseve të integrimeve europiane.
