Komisioni Qëndror i Zgjedhjeve (KQZ) në Kosovë, ka shpallur rezultatet preliminare të zgjedhjeve të –parakohshme që u mbajtën në Komunën e Podujevës.
Sipas rezultateve zyrtare, fitues është shpallur kandidati i Lëvizjes Vetëvendosje, akademiku dhe gjeografi i njohur, Shpejtim Bulliqi.
KQZ ka njoftuar se kandidati Bulliqi ka marrë 51.64 për qind të votave, Nexhmi Rudari (LDK), 36.97 për qind dhe Naim Fetahu (PDK), 12.40 për qind.
“Sa i përket rezultateve në Mitrovicën e Veriut, Lista Serbska me kandidatin Milan Radojeviq ka 89.86 për qind të votave, kandaidati Erden Artiq nga LVV ka 3.68 për qind, Florent Azemi i PDK-së ka 3.54 për qind të votave dhe kandidati i pavarur Dushan Milionoviq ka 2.92 për qind të votave”, ka thënë kryetarja e KQZ-së, Valdete Daka, duke theksuar se këto janë rezultatet preliminare të numëruara nëpër vendvotime. Sa i përket rezultateve përfundimtare, Daka tha se votat me kusht dhe ato me postë do të numërohen nesër.
Kujtojmë se ish-kryetari i kësaj komune, Agim Veliu, i cili vinte nga radhët e Lidhjes Demokratike të Kosovës (LDK), dha dorëheqjen nga ky post pasi u bë ministër i Punëve të Brendshme, në fillim në qeverinë Kurti ku dhe u shkarkua nga ky post dhe pas rrëzimit të kësaj qeverie, në qeverinë e kryeministrit aktual Avdullah Hoti, i cili vjen po ashtu nga radhët e LDK-së.
Me largimin e tij nga Podujeva, posti i kryetarit të Komunës mbeti vakant. Zgjedhjet në Podujevë, ishin parashikuar të mbaheshin më 15 mars, por për shkak të përhapjes së pandemisë covid-19, ky proces u pamundësua dhe u shty për këtë të dielë.
Mandati i kryetarëve të rinj do të jetë deri në zgjedhjet e ardhshme lokale që pritet të mbahen në tetor të vitit 2021./GazetaReforma.com/
